Plantun de Prouvènço

Pèr coumpara dos planto d'encò nostre

Agrostis castellana & Morus alba

Treinasso(-de-Castiho)

Agrostis castellana

Poaceae Graminaceae

Autre noum : Gramenet.

Noms en français : Agrostide de Castille, Agrostide.

Descripcioun :
La treinasso-de-Castiho trachis dins li pelouso e li pinedo sus sòu séusous. Èi pas uno planto di proun coumuno au nostre, aleva justamen en "Prouvènço séusouso". Ramentèn que lis Agrostis fan d'enflourejado en brout (paniculo) emé d'espigueto qu'an uno souleto flour. Aquesto treinasso fai parti dóu group emé uno palea un pau grando (>1/3 de la lemma), emé un rizoumo (courtet eici). Se destrìo de A. capillaris bonodi sa ligulo pu longo que 2,2 mm (e larjo) e sis enflourejado pas tant vióuleto.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 15 à 80 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Agrostis
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 4 à 18 cm
Flourido : Printèms - Estiéu

Sòu : Si
Autour basso e auto : 0 à 2200 m
Aparado : Noun
Mai à setèmbre

Liò : Pelouso - Pinedo
Estànci : Termoumediterran à Mountagnard
Couroulougi : Bourealo
Ref. sc. : Agrostis castellana Boiss. & Reut., 1842 (= Agrostis capillaris subsp. castellana )

Amourié-blanc

Morus alba

Moraceae

Àutri noum : Amourié, Amouhié, Amourié-rose.

Nom en français : Mûrier blanc.

Descripcioun :
L'amourié-blanc se rescontre encaro d'eici, d'eila, dins li colo e la campagno. S'èi naturalisa dins la valado dóu Rose. Se recounèis à si fueio óuvalo, en cor à la baso, e dentado. Se pòu vèire de varieta roso que ié dison amourié-rose (fotò).

Usanço :
Se saup que l'amourié, que nous vèn d'Asìo dóu couchant, fuguè proun cultiva pèr abali, emé si fueio, li magnan. Aquéli d'aqui manjon rèn qu'acò. Lou fru de l'amourié-blanc se manjo pas gaire au nostre, au contro de l'amourié-negre. Li fueio soun vertuouso pèr ajuda à digeri e dourmi, pèr lucha contro li fèbre e coume remaisso doulour.